Danmarkimi Ineqarneq
Danmarkimi inissarsiussaguit sapinngisamik siusinaarlutit ujarlernissat pingaarpoq. Danmarkimi, ingammik Københavnimi, inimik nassaarniarneq ajornakusoortarpoq.
Danmarkimi inimut akiliutit ataatsimut isigalugit Kalaallit Nunaannit qaffasinnerusarput. Namminerli inissannik pisiniaruit attartorniaruilluunniit akit assigiinngittaqaat. Inimik attartornermi akit illullu akii nalinginnaasumik illoqarfinni minnerusuni soorlu Københavnimiit Aarhusimiillu appasinnerusarput.
Danmarkip sortaani najugaqarsinnaanissannut pissutsit amerlaqisut apeqqutaapput. Suliffissaqarniarneq qanoq ippa? Kommunemi aalajangersimasumi meeqqat paaqqinnittarfimmiittarnissaat qanoq pisariitsigaa? Kikkut tamat angallavigisinnaasaannut atatillugu pissutsit qanoq ippat?
Danmarki mikingaluaqisoq sumiiffiit qanoq ungasitsigisinnaaneri tupaallannartarpoq. Suliffigisamiit atuarfigisamiilluunniit qanittumi najugaqalinngikkaanni, sivisuumik angalasoqartariaqalertarpoq. Periarfissaqaruit sulinngiffeqarninni Danmarkimi nuuffigerusutavit ilai takusaqqaakkit.
Danmarkimut nuuttut amerlaqisut ilaquttaminni ikinngutiminniluunniit najugaqaqqaartarput. Tamannali ilaatigut isumatusaarnerusanngitsoq misissuinerit takutippaat. Aallaqqaammut iluarusunnarsinnaagaluartoq ullut nalinginnaat nalliuttarput, tamannalu nuuttut ilaannut isumaqatigiinnginnernik angerlarsimaffissaaleqinermillu kinguneqartarpoq. Taamaammat nutsinnginnermi inissaqarnerup aaqqiiffigeqqaarnissaa isumatusaarneruvoq.
Danmarkimi inissaqarniarneq pillugu sukumiinerusumik uani atuarit; norden.org (qallunaatut).